По 12 пат во охридското село Куратица се одржа Василичарскиот карневал на кој годинава продефилираа 64 поединечни и групни маски. За најдобра маска во категоријата возрасни беше прогласена поставката „Ослободувањето на братот Јохан", а награди уште освоија и маските „Шумските крадци", „Безвизен режим" и „Свадбата на Шехерзад и Онур".. Тука беа и лекарите кои лечат свински грип и уште многу други креативни маски. Во категоријата деца првото место го освои маската „Камено време", второто маската „Курајчка историја", а третото групната маска „Првите македонци во вселената". Наградниот фонд годинава изнесуваше 1000 евра. Василичарската атмосфера се загреваше со околу 200 литри ракија и еден тон вино. Според жителите на Куратица карневалот е стар исто колку што е старо и селото, а одредени непотврдени податоци говорат дека маскирањето во Куратица има традиција од далечната 1575 година. Манифестацијата во Куратица од година станува се помасовна, а целта е, како што велат организаторите, таа да прерасне во туристичка атракција.